CatSU tututukan ang program accreditation alinsunod sa bagong CHED framework
October 7, 2025
Nangako si Catanduanes State University (CatSU) President Dr. Gemma G. Acedo na mas pagtutuunan ng unibersidad ang program accreditation, kabilang ang mga kursong kasalukuyang nasa candidate status, bilang tugon sa hamon ng Commission on Higher Education (CHED) para sa mas mataas na pamantayan ng edukasyon.
Ipinahayag ang pangakong ito sa konteksto ng kauna-unahang President’s Summit na ginanap sa Century Park Hotel sa Malate, Manila, na dinaluhan ng lahat ng pangulo ng State Universities and Colleges (SUCs) sa bansa. Inorganisa ang pagtitipon ng Accrediting Agency of Chartered Colleges and Universities in the Philippines (AACUP) upang i-align ng mga higher education institutions (HEIs) ang kanilang bisyon sa bagong accreditation framework.
Bilang panauhing tagapagsalita, hinimok ni CHED Chairman Shirley C. Agrupis ang mga unibersidad na seryosohin ang accreditation at aktibong makibahagi sa proseso. Binigyang-diin ni Dr. Agrupis na ang inilunsad na framework ay hindi lamang update kundi isang muling paghubog, at layong lumikha ng sistema na sumusukat sa kahusayan ng mga programa ng HEIs.
Kasama ni Dr. Acedo sa summit sina Bb. Josephine D. Rojas, Administrative Officer V ng Quality Assurance Unit, at Asst. Prof. Ian V. Aranel, Dean ng College of Business and Accountancy (CBA) at Acting Executive Assistant III. Ipinahayag ni Dr. Acedo na positibo ang tugon ng unibersidad sa hamon ng CHED at nangakong tututukan ang lahat ng aspeto ng program accreditation, kabilang ang mga kursong nasa candidate status tulad ng Bachelor of Culture and Arts Education at Bachelor of Physical Education.
Kabilang sa mga bagong nirebisang pamantayan at instrumento ang para sa Teacher Education, na ibinahagi ni Dr. Bert J. Tuga, Pangulo ng Philippine Normal University (PNU).